वासिङ्टन । विश्वकै सबैभन्दा धनी व्यक्ति एलन मस्क इतिहासमा पहिलो पटक दुई अङ्कको खर्बपति बन्ने बाटोमा तीव्र गतिमा अघि बढिरहेका छन् । प्रतिष्ठित पत्रिका फोर्ब्स का अनुसार मस्क हाल पाँच खर्ब डलर पार गरी यस यात्रा को आधा चरणमा पुगेका छन्।
टेस्ला र स्पेसएक्सका संस्थापक मस्कको नेटवर्थ हालै पाँच खर्ब १० अर्ब डलरसम्म पुगेको थियो, तर सेयर बजारको उतार–चढावका कारण केही समयमै चार खर्ब ९९ अर्ब १० करोड डलरमा झरेको फोर्ब्सको रियल–टाइम बिलियनेयर्स ट्र्याकरमा उल्लेख छ।
विश्वका अन्य धनी व्यक्ति
मस्कपछि दोस्रो स्थानमा ओरेकलका सिइओ ल्यारी एलिसन तीन खर्ब ५० अर्ब ७० करोड डलरसहित छन् भने तेस्रो स्थानमा मेटाका प्रमुख मार्क जुकरबर्ग दुई खर्ब ४५ अर्ब ८० करोड डलरसहित रहेका छन्।
विद्यार्थी जीवनदेखि उद्यमशीलताको यात्रा
दक्षिण अफ्रिकामा जन्मिएका मस्कले पेन्सिलभेनिया विश्वविद्यालयबाट स्नातक गरेपछि स्ट्यानफोर्डमा अध्ययन सुरु गरे पनि पूरा गर्न सकेनन्। सन् १९९९ मा पहिलो ठूलो सफलता उनले आफ्नै अनलाइन प्रकाशन सफ्टवेयर कम्पनी कम्प्याकलाई ३० करोड डलरभन्दा बढीमा बिक्री गरेर पाए।
पछि सुरु गरेको अर्को कम्पनी पेपालसँग मर्ज भयो। त्यसपछि उनले २००२ मा स्पेसएक्स र २००४ मा टेस्ला मा संलग्न हुँदै कम्पनीलाई विश्वकै प्रमुख प्रविधि व्यवसायमा रूपान्तरण गरे।
भविष्यको खाका
विशेषज्ञहरूको मूल्याङ्कन अनुसार मस्कको सम्पत्ति वृद्धिको मूल आधार टेस्ला, स्पेसएक्स र उनका अन्य प्रविधि व्यवसाय हुन्। फोर्ब्सका अनुसार यदि हालको गतिमा प्रगति जारी रह्यो भने मस्क विश्व इतिहासमा पहिलो दुई अङ्कको खर्बपति बन्न सक्ने प्रबल सम्भावना छ।
फोर्ब्सले टिप्पणी गरेको छ, “मस्कले आफ्नो साहस, नवीन सोच र प्रविधिमा लगानीमार्फत सम्पत्ति मात्र नभई विश्व अर्थतन्त्रको भविष्यलाई समेत नयाँ परिभाषा दिइरहेका छन्।”
