सत्तारूढ राष्ट्रिय स्वतन्त्र पार्टी (रास्वपा) को महत्वपूर्ण सचिवालय बैठक आज दिउँसो पार्टी केन्द्रीय कार्यालय चःमतिमा बस्दैछ। पार्टीको साङ्गठनिक सुदृढीकरण र आगामी महाधिवेशनको तयारीलाई केन्द्रमा राखेर आजको बैठकका लागि ६ वटा मुख्य कार्यसूची तय गरिएको छ। प्रवक्ता मनिष झाका अनुसार आजको बैठकले मुख्य रूपमा 'जिल्ला अधिवेशन कार्यविधि २०८३' लाई छलफल गरी अन्तिम रूप दिने तयारी गरेको छ, जसले पार्टीको तल्लो तहसम्मको लोकतान्त्रिक संरचनालाई व्यवस्थित बनाउनेछ।
बैठकले पार्टीका रिक्त रहेका केन्द्रीय आयोगहरू, सल्लाहकार परिषद्, संघीय नेतृत्व मञ्च र विभिन्न विभागहरूमा मनोनयन गरी साङ्गठनिक शून्यता चिर्ने लक्ष्य राखेको छ। साथै, महाधिवेशन कार्यविधि मस्यौदा समिति गठन, बैंक खाता सञ्चालन र संसदीय दलका लागि प्राविधिक सहायता एवं लेबी निर्धारण जस्ता आन्तरिक व्यवस्थापनका मुद्दाहरूमा पनि निर्णय हुनेछ। विशेषगरी, प्रतिनिधिसभा सदस्यहरूलाई ठोस संगठनात्मक जिम्मेवारी तोक्ने र केन्द्रीय समितिको पूर्ण बैठक आह्वान गर्ने तयारीले रास्वपा अब चुनावी मुडबाट पूर्ण रूपमा साङ्गठनिक विस्तारको चरणमा प्रवेश गरेको संकेत गरेको छ।
