ललितपुर, असोज ३१ — नेकपा (एमाले) केन्द्रीय कमिटीको १०औं बैठकमा केन्द्रीय सदस्य उषाकिरण तिम्सिनाले अध्यक्ष केपी शर्मा ओलीको राजीनामा माग गरेकी छन्। उनले जेनजी आन्दोलनपछि नेपाली राजनीतिको मुख्य कार्यभार दलहरूको पुनर्गठन रहेको उल्लेख गर्दै एमालेमा पनि नेतृत्व हस्तान्तरणको समय आएको बताइन्।
बैठकमा प्रस्तुत दशबुँदे सुझावपत्रमार्फत तिम्सिनाले भनिन्, “अध्यक्षले अब अभिभावकको भूमिकामा रहँदै पार्टीलाई नयाँ पुस्तालाई हस्तान्तरण गर्नुपर्छ। ओलीले बिदा लिनेबित्तिकै देशभर सकारात्मक सन्देश जानेछ।”
उनले हालको राजनीतिक गतिरोध तोड्न नेतृत्व परिवर्तन आवश्यक रहेको भन्दै “यही संरचना लिएर चुनाव वा आन्दोलनमा जानै सकिँदैन” भनेकी छन्।
🔹 “जेनजी आन्दोलनको माग– नयाँ पुस्तालाई अवसर”
तिम्सिनाले जेनजी आन्दोलनको मूल सन्देशलाई सम्बोधन गर्न सबै दलले पुनर्गठन गर्नुपर्ने औंल्याइन्।
उनका शब्दमा, “आजको मुख्य कार्यभार दलहरूको पुनर्संरचना हो। कांग्रेसले सुरुवात गरिसक्यो, अब एमालेको पालो हो।”
उनले पार्टीका विगतका निर्णय र अभ्यासले जनविश्वासमा गिरावट ल्याएको भन्दै “११ वर्षको नेतृत्वले वाम आन्दोलनलाई कता पुर्यायो, एकपल्ट आत्मालोचना गरौँ” भनेर प्रश्न गरिन्।
🔹 मीनबहादुर गुरुङको सहयोग फिर्ता गर्न सुझाव
व्यवसायी मीनबहादुर गुरुङको सम्पत्ति जेनजी आन्दोलनमा क्षति भएको उल्लेख गर्दै तिम्सिनाले पार्टी कार्यालयका लागि उनले दिएका जग्गा फिर्ता गर्ने निर्णय गर्नुपर्ने मागसमेत गरिन्।
उनले भनिन्, “मीनबहादुर गुरुङको सम्पत्तिमाथि हमला भयो, त्यसैले सहयोग फिर्ता गर्ने निर्णय गरौँ। यो नैतिकताको प्रश्न हो।”
🔹 पार्टीभित्रको आलोचना र आत्मालोचनाको आवश्यकता उषाकिरणले पार्टीभित्र आलोचनात्मक संस्कार हराउँदै गएको बताउँदै प्रश्न उठाइन्, “दुर्गा प्रसाईँजस्ता अराजक तत्वलाई कसले पार्टीमा भित्र्यायो? त्यसको जिम्मेवारी कोले लिने?”
उनले एमालेले प्रतिक्रियात्मक होइन, जिम्मेवार र अग्रगामी पार्टीको रूपमा पुनर्जन्म लिनुपर्ने बताइन्।
“एक व्यक्तिको महत्वाकांक्षाका कारण सिङ्गो पार्टीको विकास अवरुद्ध हुनु हुँदैन,” उनको भनाइ थियो।
🔹 निर्वाचनमा नयाँ नेतृत्वसहित जानुपर्ने माग
संविधान र शासन प्रणाली संकटमा रहेको भन्दै उनले संसद् पुनर्स्थापनाको सट्टा शीघ्र निर्वाचनमा नयाँ पुस्ता लिएर जाने आग्रह गरिन्।
उनका अनुसार, “नयाँ नेतृत्वसहित चुनावमा गयौँ भने एमाले फेरि खरानी टकटक्याएर बौरिनेछ।”
उषाकिरण तिम्सिनाको प्रस्तुतीले एमालेभित्र नेतृत्व हस्तान्तरण र आन्तरिक पुनर्गठनबारे बहस पुनः तीव्र बनाएको छ। उनी पार्टीभित्र आलोचनात्मक आवाजको प्रतिनिधि नेताका रूपमा उदाएकी छन्।
