२५ असोज, काठमाडौं । गाजामा शुक्रबारदेखि लागू भएको युद्धविरामले दुई वर्षअघि विस्थापित भएका हजारौं प्यालेस्टिनी नागरिकलाई आफ्ना घर फर्किन प्रेरित गरेको छ। दक्षिणी गाजाबाट उनीहरू पैदलै गाजा सिटीतर्फ अघि बढिरहेका छन्।
सन् २०२३ अक्टोबर ७ मा हमासद्वारा गरिएको आक्रमणपछि इजरायलसँग सुरु भएको भीषण युद्धका कारण उत्तर गाजाका बासिन्दाहरूले आफ्नो शहर खाली गर्न बाध्य भएका थिए। तर अहिले, गाजा सिटी — कहिल्यै न सुतेको यो शहर — अब भग्नावशेषमा परिणत भएको छ।
त्यहाँ न बिजुली बाँकी छ, न पानी, न विद्यालय, न अस्पताल। एक समय जीवनले धड्किरहेको यो शहर अब केवल ढुंगामाटोको थुप्रोजस्तै बनेको छ। तर पनि, मानिसहरू आफ्नै माटोमा फर्किन चाहन्छन्। घर फर्किएका एक नागरिकले मिडियासँग भावुक हुँदै भने,
“मेरो घर अब केवल निशान बनेको छ। पूरा भवन भग्नावशेषमा पुरिएको छ, तर यो नै मेरो घर हो, मेरो पहिचान हो।”
अमेरिकी राष्ट्रपति डोनाल्ड ट्रम्पको मध्यस्थतामा सम्पन्न यो युद्धविराम अन्तर्गत हमासले ७२ घण्टाभित्र सबै जीवित इजरायली बन्दीहरूलाई मुक्त गर्नेछ। यसको साटोमा इजरायलले २५० प्यालेस्टिनी कैदी र १,७०० हिरासतमा रहेका व्यक्तिहरूलाई रिहा गर्ने सहमति जनाएको छ।
इजरायलले आफ्नो ५३ प्रतिशत क्षेत्रबाट सेना फिर्ता गर्ने घोषणा गरिसकेको छ। साथै, दैनिक ६०० राहत ट्रकहरू गाजामा प्रवेश गर्न दिने निर्णय भएको छ। यस्तै, पुनःस्थापनाका प्रयोजनका लागि २०० अमेरिकी सैनिकहरू गाजामा तैनाथ गरिनेछ।
शान्तिको आशा अझै कमजोर छ, तर भग्नावशेषबीच पनि गाजाका नागरिकहरूमा आफ्नै भूमि, आफ्नै जीवन र अस्तित्वप्रतिको विश्वास बलियो देखिन्छ।
