नेपाल नागरिक उड्डयन प्राधिकरणका पूर्वमहानिर्देशक प्रदीप अधिकारीमाथि अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईलाई राजीनामा दिन बाध्य पार्न करोडौँको डिल गर्नेदेखि ज्यान मार्ने धम्की र तान्त्रिक अनुष्ठानसम्म गराएको गम्भीर आरोपसहित काठमाडौं जिल्ला अदालतमा मुद्दा दायर भएको छ। कुनै समय नेपालको प्रशासनिक संयन्त्रमा 'स्थायी सरकार' कै रूपमा चिनिने र अर्बौं रुपैयाँका पूर्वाधार ठेक्काहरूमा असीमित प्रभाव राख्ने अधिकारीले अख्तियारको अनुसन्धानबाट बच्नका लागि यस्तो आपराधिक र डरलाग्दो षड्यन्त्र रचेको प्रहरी अनुसन्धानबाट खुलेको छ। अधिकारीविरुद्ध १८ वैशाखमा काठमाडौं जिल्ला अदालतमा संगठित अपराध, अवैध हुन्डी कारोबार र ज्यान मार्ने उद्योगअन्तर्गत पाँचौं फौजदारी मुद्दा दर्ता गरिएको छ।
घटनाको सुरुवात १५ असोज २०८२ मा अख्तियारको इमेलमा आएको एउटा धम्कीपूर्ण सन्देशबाट भएको थियो। 'एक्स्ट्रिमिस्ट ग्रुप अफ नेपाल (ईजीएन)' का अध्यक्ष प्रकाश पाठकको नामबाट आएको उक्त इमेलमा प्रमुख आयुक्त राईलाई १० दिनभित्र राजीनामा नदिए आयोगका १० जना अधिकारीको हत्या गर्ने चेतावनी दिइएको थियो। प्रहरीले इमेलको मेटाडाटा, ह्वाट्सएप खाता र नेपालदेखि भारत, यूएई र फिलिपिन्ससम्म फैलिएको वित्तीय कारोबारको सुक्ष्म अनुसन्धान गर्दै जाँदा त्यसको अन्तिम योजनाकार प्रदीप अधिकारी रहेको निष्कर्ष निकालेको छ। अधिकारीले अख्तियार प्रमुखलाई राजीनामा दिन बाध्य पार्ने उद्देश्यले ८ देखि १० करोड रुपैयाँसम्म खर्च गर्ने प्रतिबद्धता जनाएको र तत्काल २ करोड रुपैयाँ हुन्डीमार्फत फिलिपिन्स पुर्याएको प्रहरीको दाबी छ। उक्त रकम व्यवस्थापनमा पोखरा अन्तर्राष्ट्रिय विमानस्थल निर्माणको ठेक्का पाएको चिनियाँ कम्पनी सीएएमसी इन्जिनियरिङ लिमिटेडका निर्देशकहरूको समेत संलग्नता रहेको बयान पक्राउ परेका पाठकले दिएका छन्।
भ्रष्टाचारका शृंखलाबद्ध फाइलहरू खुल्दै गएपछि अत्तालिएका अधिकारीले अनुसन्धान अधिकृत र प्रमुख आयुक्तलाई हानि पुर्याउन तान्त्रिकहरूको समेत प्रयोग गरेको डरलाग्दो तथ्य फेला परेको छ। भारतको गुवाहाटीस्थित कामाख्या क्षेत्रका तान्त्रिक सराया किन्नेरामार्फत अधिकारीका निकटस्थ निर्माण व्यवसायी नवीनराज बस्नेतले राईलाई लक्षित गरी 'छामटा' भनिने कालो जादु र विशेष अनुष्ठान गराएका थिए। प्रमाणका रूपमा अदालतमा पेस गरिएको भिडियोमा राईजस्तै देखिने पुत्लालाई धारिलो हतियारले घोच्दै 'भस्म' गरिएको र पृष्ठभूमिमा 'काम सकियो, अब ऊ मर्छ' भन्ने भ्वाइस मेसेजसमेत सुनिएको छ। अधिकारीले भने आफूमाथिका सबै आरोपहरू अस्वीकार गर्दै यी मुद्दाहरू राज्यद्वारा सञ्चालित प्रतिशोधको हिस्सा भएको दाबी गरेका छन्। हाल पुर्पक्षका लागि डिल्लीबजार कारागारमा रहेका अधिकारीविरुद्ध अख्तियारले यसअघि नै पोखरा विमानस्थल निर्माणमा भएको अनियमितता र नलिञ्चोकको हेलिपोर्ट निर्माणमा भ्रष्टाचार भएको भन्दै मुद्दा दायर गरिसकेको छ। राज्य संयन्त्रको उच्च पदमा बसेर शक्ति र पैसाको आडमा संवैधानिक निकायलाई नै चुनौती दिने यो घटनाले नेपालको सुशासन र प्रशासनिक भ्रष्टाचारको विकराल र कुरूप अनुहारलाई उदाङ्गो पारेको छ।
