काठमाडौं । नेपालीहरूको महान पर्व विजया दशमी (बडा दसैं) सकिएसँगै देशभरका सरकारी कार्यालयहरूमा चहलपहल पुनः सुरू भएको छ।
दसैंको लामो बिदा पछि सोमबारदेखि सिंहदरबारसहित देशभरका सरकारी कार्यालयहरूमा कर्मचारीहरू आफ्नो काममा फर्किएका छन्। बिदा अवधिमा सुनसान बनेका कार्यालयहरूमा आजबाट पुनः रौनक बढेको देखिन्छ।
यस वर्ष असोज १६ गते टीका परेका कारण त्यसपछिका पाँच दिनसम्म टीका तथा जमराका साथ शुभकामना आदानप्रदान गर्ने चलन रहँदै आएको छ। फूलपातीदेखि द्वादशीसम्म सरकारले सार्वजनिक बिदा दिएको थियो।
अब बिदा सकिएसँगै सरकारी सेवाहरू पुनः नियमित बनेका छन्। सिंहदरबारमा पनि विगत केही दिनदेखि बन्द रहेका कक्षाहरूमा आजदेखि फाइल चल्न थालेका छन् र नागरिक सेवाका कामकाज पुनः तीव्र गतिमा अघि बढ्न थालेका छन्।
राजधानीका अन्य सरकारी निकायहरूमा पनि बिहानैदेखि सेवाग्राहीहरूको उपस्थितिले कार्यालयहरूमा उत्साहपूर्ण वातावरण देखिएको छ। दसैंको उमंगसँगै अब तिहार र छठ पर्वका तयारीले पनि रौनक थपिने अपेक्षा गरिएको छ।
