साढे चार महिना लामो कूटनीतिक अडान तोड्दै शीर्ष संवादमा फर्किएका प्रधानमन्त्री वालेन्द्र शाह (बालेन) ले छिमेकी मुलुक भारतको भ्रमण गर्ने स्पष्ट सङ्केत दिएका छन्। भारतीय प्रधानमन्त्री नरेन्द्र मोदीका तर्फबाट पठाइएको औपचारिक निमन्त्रणा स्वीकार गर्दै प्रधानमन्त्री शाहले उपयुक्त समय मिलाएर छिट्टै भारत भ्रमणमा जाने बताएका हुन्। गत चैतमा नेपालको सत्ता सम्हालेलगत्तै भारतीय समकक्षी मोदीले पठाएको बधाई सन्देश र निम्तो पत्र लामो समयदेखि थन्किएर बसेको थियो। कूटनीतिक प्रोटोकलको कडा अडानका कारण भारतीय राजदूत र विदेश सचिवले समेत प्रधानमन्त्री शाहलाई भेट्न नपाएपछि यो निम्तो हस्तान्तरण हुन सकेको थिएन। तर सोमबार सिंहदरबारमा भएको उच्चस्तरीय भेटपछि भने दुई देशबीचको कूटनीतिक संवादले नयाँ र द्रुत मोड लिएको छ।
नेपालमा नयाँ सरकार बनेपछि विगतमा देखिँदै आएका कूटनीतिक विकृति र अस्वाभाविक पहुँचमा ब्रेक लगाउन प्रधानमन्त्री बालेन शाहले वैदेशिक प्रतिनिधिहरूसँगको प्रत्यक्ष भेटघाटमा पूर्ण प्रतिबन्धजस्तै लगाएका थिए। यही नीतिका कारण भारतीय विदेश सचिव विक्रम मिश्रीको तय भइसकेको नेपाल भ्रमण समेत प्रधानमन्त्रीसँग भेटको समय निश्चित नभएपछि अन्तिम समयमा स्थगित हुन पुगेको थियो। शीर्ष तहमै संवादहीनताको स्थिति सिर्जना भएपछि दुई देशबीच केही कूटनीतिक चिसोपन बढेको चर्चा चुलिएको थियो। तर, भू-राजनीतिक संवेदनशीलता र छिमेकी राष्ट्रसँगको विश्वास अभिवृद्धि गर्ने रणनीतिक आवश्यकतालाई बोध गर्दै प्रधानमन्त्री शाह आफ्नो अडानबाट पछि हटेका हुन्।
सोमबार भारतीय राजदूत नवीन श्रीवास्तवलाई सिंहदरबारस्थित प्रधानमन्त्री कार्यालयमा बोलाएर गरिएको भेटवार्ताले रोकिएका कूटनीतिक प्रक्रियाहरूको ढोका उघारेको छ। सोही भेटमा राजदूत श्रीवास्तवले प्रधानमन्त्री मोदीको तर्फबाट ल्याइएको भ्रमणको निम्तो आधिकारिक रूपमा हस्तान्तरण गरेका थिए। निम्तो स्वीकार गर्दै प्रधानमन्त्री शाहले भारतसँगको ऐतिहासिक र बहुआयामिक सम्बन्धलाई अझ प्रगाढ बनाउन आफू प्रतिबद्ध रहेको र समय मिलाएर भारत भ्रमणमा निस्कने स्पष्ट पारेका हुन्। यो कूटनीतिक संवादले विगत केही महिनादेखि छाएको अन्योल र दूरीलाई समाप्त पार्दै दुवै देशबीच उच्चस्तरीय सहकार्यको नयाँ अध्याय सुरु भएको सङ्केत दिएको छ।
