३१ भदौ, काठमाडौं ।
पृथ्वी राजमार्गको कृष्णभीरमा भासिएको सडक १८ दिनपछि पुनः सञ्चालनमा आउने भएको छ। सडक मर्मत तथा नयाँ ट्र्याक निर्माणको काम पूरा भएसँगै भोलि बिहीबार बिहान ६ बजेदेखि दुईतर्फी यातायात सञ्चालन गर्ने तयारी गरिएको छ।
काठमाडौंलाई देशका प्रमुख शहर तथा पश्चिम नेपालसँग जोड्ने महत्वपूर्ण मार्ग लामो समय अवरुद्ध हुँदा यात्रु, यातायात व्यवसायी र मालवाहक सवारीसाधन प्रत्यक्ष प्रभावित भएका थिए। राजमार्ग नियमित रूपमा सञ्चालन हुन नसक्दा यातायात व्यवसायीले करोडौं रुपैयाँ बराबरको आर्थिक क्षति बेहोर्नुपरेको नेपाल यातायात व्यवसायी राष्ट्रिय महासंघले जनाएको छ।
१४ भदौमा भासिएको थियो सडक
कृष्णभीरमा गत १४ भदौमा करिब १ सय मिटर सडक भासिएपछि पृथ्वी राजमार्गको नियमित यातायात प्रभावित भएको थियो। जोखिमपूर्ण सडकखण्डमा नयाँ ट्र्याक निर्माण गरी सवारी सञ्चालनयोग्य बनाउन १८ दिन लागेको हो।
यस अवधिमा वैकल्पिक सडक प्रयोग गरेर यातायात सञ्चालन गरिए पनि ठूला सवारीसाधन तथा लामो दूरीका रुटमा चल्ने बस र मालवाहक सवारी सबैभन्दा बढी प्रभावित भएका थिए। यात्रुलाई समयमै गन्तव्यमा पुर्याउनसमेत कठिनाइ भएको व्यवसायीहरूको भनाइ छ।
यातायात व्यवसायीलाई ठूलो राहत
राजमार्ग पुनः सञ्चालनमा आउने भएपछि यातायात व्यवसायीले राहत महसुस गरेका छन्। नेपाल यातायात व्यवसायी राष्ट्रिय महासंघले आफ्ना सदस्य संघ, समिति, कम्पनी तथा प्रालिलाई पृथ्वी राजमार्ग हुँदै पूर्ववत् सेवा सञ्चालन गर्न तयारी अवस्थामा रहन जानकारी गराएको छ।
१८ दिनदेखि प्रभावित काठमाडौं–पोखरा तथा पश्चिमतर्फको आवागमन नियमित बन्ने अपेक्षा गरिएको छ। तर नयाँ ट्र्याकबाट सवारी सञ्चालन हुने भएकाले सडकको अवस्था, सवारीको गति र सुरक्षा व्यवस्थामा विशेष सावधानी आवश्यक देखिन्छ।
कृष्णभीर खुलेसँगै अब यात्रुको प्रश्न एउटै छ—१८ दिनदेखि रोकिएको पृथ्वी राजमार्गले बिहीबारदेखि साँच्चिकै पुरानै लय समात्ला?onlinekhabar
