काठमाडौं - “रक्तदान नै जीवनदान हो” भन्ने मानवीय सन्देशसहित रसुवामा भोटेकोशी नदीमा आएको विनाशकारी बाढीबाट प्रभावित नागरिकको सहयोगका लागि काठमाडौंमा बृहत् रक्तदान कार्यक्रम आयोजना हुने भएको छ।
नेपाली कांग्रेसका प्रभावशाली युवा नेता पुष्कर बास्तोलाको आह्वानमा आयोजना हुन लागेको कार्यक्रममा विपद्को यस कठिन घडीमा मानवीय एकता र सामाजिक उत्तरदायित्व प्रदर्शन गर्दै युवाहरू तथा सर्वसाधारणलाई रक्तदानमा सहभागी हुन अपिल गरिएको छ।
कार्यक्रम बिहीबार, भदौ ११ गते बिहान ११:३० बजे त्रि–चन्द्र बहुमुखी क्याम्पसमा आयोजना हुनेछ। कार्यक्रमको आयोजक नेपाल तरुण दल, केन्द्रीय कार्यसमिति रहेको पोस्टरमा उल्लेख छ।
रसुवाको भोटेकोशी नदीमा बुधबार बिहान आएको आकस्मिक भीषण बाढीले टिमुरे, स्याफ्रुबेँसी, रसुवागढी लगायतका क्षेत्रमा ठूलो जनधन तथा भौतिक क्षति पुर्याएको छ। बाढीले घर, बजार, सडक, पुल, सरकारी तथा सुरक्षा निकायका संरचना र जलविद्युत् आयोजनासमेत प्रभावित भएका छन्।
प्रारम्भिक विवरणअनुसार बाढीबाट भएको मानवीय क्षतिको यकिन विवरण अझै संकलनकै क्रममा छ। पछिल्लो सरकारी तथा सञ्चारमाध्यमका विवरणमा मृत्यु पुष्टि भएका तथा सम्पर्कविहीन व्यक्तिको संख्या निरन्तर अद्यावधिक भइरहेको छ। रसुवाको टिमुरे क्षेत्रमा सुरक्षाकर्मीसहित धेरै व्यक्ति सम्पर्कविहीन रहेको विवरणसमेत सार्वजनिक भएका छन्।
यस विपद्का कारण तल्लो तटीय क्षेत्रमा समेत जोखिम बढेको छ। त्रिशूली नदी आसपासका बासिन्दालाई उच्च सतर्कता अपनाउन आग्रह गरिएको छ। उद्धारका लागि नेपाली सेना, नेपाल प्रहरी, सशस्त्र प्रहरी तथा अन्य उद्धार टोली परिचालन भएका छन् भने घाइते तथा प्रभावितको उद्धार र उपचारलाई तीव्रता दिइएको छ।
यस्तो विषम परिस्थितिमा आयोजना हुन लागेको रक्तदान कार्यक्रमलाई केवल रक्तदानमा सीमित नभई विपद्मा परेका नागरिकप्रति ऐक्यबद्धता जनाउने मानवीय अभियानका रूपमा हेरिएको छ।
नेपाली कांग्रेसको लोकतान्त्रिक तथा सामाजिक मूल्यलाई आत्मसात् गर्दै युवा पुस्तालाई सेवामुखी अभियानमा जोड्ने उद्देश्यले कार्यक्रम आयोजना गरिएको आयोजकको सन्देश छ। संकटको समयमा राजनीति र व्यक्तिगत स्वार्थभन्दा माथि उठेर मानवीय सेवामा हातेमालो गर्नुपर्ने सन्देशसमेत कार्यक्रमले दिने अपेक्षा गरिएको छ।
“आज रसुवालाई हाम्रो साथ चाहिएको छ, विपद्मा परेका नागरिकलाई हाम्रो सहयोग चाहिएको छ। एउटा पिन्ट रगतले कसैको जीवन बचाउन सक्छ। त्यसैले सक्ने सबैले त्रि-चन्द्रमा उपस्थित भएर रक्तदान गरौँ, मानवताको पक्षमा उभिऔँ।”
आयोजकले रक्तदान गर्न सक्ने सबै युवाहरू, नेपाली कांग्रेसका नेता-कार्यकर्ता, विद्यार्थी, सामाजिक अभियन्ता तथा सर्वसाधारणलाई कार्यक्रममा सहभागी हुन विशेष अपिल गरेको छ।
स्थान : त्रि-चन्द्र बहुमुखी क्याम्पस
मिति : भदौ ११ गते, बिहीबार
समय : बिहान ११:३० बजे
आयोजक : नेपाल तरुण दल, केन्द्रीय कार्यसमिति
रक्तदान गरौँ-जीवन बचाऔँ।
रसुवा बाढीपीडितको दुःखमा हातेमालो गरौँ।
