🇦🇪 युएईमा नयाँ भिजिट भिसा नियम : परिवार र साथी लैजान तलब सीमा ४ हजारदेखि १५ हजार दिरामसम्म

संयुक्त अरब इमिरेट्स (युएई) ले भिजिट भिसामा परिवार, आफन्त तथा साथीलाई लैजाने प्रक्रिया कडाइ गर्दै नयाँ नियम लागू गरेको छ। नयाँ व्यवस्थाअनुसार अब भिजिट भिसाका लागि स्पोन्सर गर्ने व्यक्तिको आम्दानीको स्रोत बलियो हुनुपर्नेछ।

युएईका विभिन्न सञ्चार माध्यमका अनुसार स्पोन्सरको न्यूनतम मासिक तलब ४ हजारदेखि १५ हजार दिराम बीच हुनुपर्ने व्यवस्था गरिएको छ।

नयाँ मापदण्ड अनुसार—

बुबा, आमा, श्रीमान/श्रीमती, छोराछोरीलाई भिजिट भिसामा लैजानका लागि स्पोन्सरको मासिक तलब कम्तीमा ४ हजार दिराम हुनुपर्छ।

हजुरबा, हजुरआमा, दाजुभाइ, दिदीबहिनी, नाति–नातिनी, काका–काकी, मामा, फुपूजस्ता आफन्त लैजानका लागि ८ हजार दिराम तलब अनिवार्य गरिएको छ।

साथीभाइ वा नातेदार नभएका व्यक्तिलाई भिजिट भिसामा बोलाउन भने स्पोन्सरको तलब कम्तीमा १५ हजार दिराम हुनुपर्नेछ।

भिजिट भिसा आवेदन दिँदा नाता प्रमाणित कागजात, कम्तीमा ६ महिना बाँकी म्याद भएको पासपोर्ट, र फिर्ती यात्रा टिकट अनिवार्य रुपमा पेस गर्नुपर्नेछ।

युएई सरकारले भिजिट भिसा प्रणालीमा पारदर्शिता र नियन्त्रण बढाउन नयाँ व्यवस्था ल्याएको बताइएको छ। पछिल्लो समय भिजिट भिसा दुरुपयोग बढ्दै गएपछि यस्तो कदम चालिएको हो।

हालैको आन्दोलनपश्चात युएईले नेपाली नागरिकका लागि भिजिट भिसा अस्थायी रूपमा रोक्दै आएको छ। नयाँ नियम लागू भएसँगै नेपाली नागरिकहरूका लागि नीति कसरी लागू हुन्छ भन्नेबारे भने अझै स्पष्ट गरिएको छैन।