काठमाडौँ । राष्ट्रिय स्वतन्त्र पार्टी (रास्वपा) का नेता सुदन गुरुङ पुनः मुलुकको गृहमन्त्री बन्ने भएका छन्। प्रधानमन्त्री बालेन्द्र शाह (बालेन) नेतृत्वको सरकारमा केही समयअघि मात्रै राजीनामा दिएका गुरुङलाई प्रधानमन्त्री शाहले पुनः गृह मन्त्रालयकै शक्तिशाली जिम्मेवारी सुम्पन लाग्नुभएको हो।
छानबिन समितिबाट 'क्लीन चिट' पछि पुनरागमन
यसअघि अकुत सम्पत्ति आर्जन लगायतका विभिन्न विवादहरूमा नाम जोडिएपछि नैतिक दबाबका बीच गुरुङले गृहमन्त्री पदबाट राजीनामा दिनुभएको थियो। उहाँमाथि लागेका आरोपहरूको निष्पक्ष अनुसन्धान गर्न सरकारले एउटा उच्चस्तरीय छानबिन समिति गठन गरेको थियो।
उक्त छानबिन समितिले गुरुङमाथि लागेका आरोपहरू निराधार रहेको निष्कर्ष निकाल्दै पूर्ण रूपमा 'क्लीन चिट' (निर्दोष साबित) दिएपछि उहाँलाई पुनः गृह प्रशासनको बागडोर सम्हाल्न लागिएको हो। केही दिनअघि मात्रै धादिङको एक कार्यक्रममा गुरुङले आफ्नै सरकारले आफ्नो सम्पत्तिको "तोला-तोला सुन जोख्ने गरी" कडा छानबिन गरिरहेको खुलासा गर्नुभएको थियो।
आजै ३ बजे शीतल निवासमा शपथ ग्रहण
प्रधानमन्त्री कार्यालय स्रोतका अनुसार नवनियुक्त गृहमन्त्री गुरुङको शपथ ग्रहण आजै दिउँसो ३ बजे राष्ट्रपति कार्यालय (शीतल निवास) मा हुने गरी सम्पूर्ण तयारी पूरा भइसकेको छ। यसका लागि प्रधानमन्त्री कार्यालयले आवश्यक व्यवस्था र समय व्यवस्थापनका लागि राष्ट्रपति कार्यालयलाई औपचारिक पत्राचारसमेत गरिसकेको छ।
आफ्नै दल र सरकारको कडा परीक्षा उत्तिर्ण गरेर गृह मन्त्रालयमा फर्किन लाग्नुभएका गुरुङको यो दोस्रो इनिङ्सलाई राजनीतिक वृत्तमा निकै चासोका साथ हेरिएको छ। उहाँको पुनरागमनले सुशासन र अवैध सम्पत्ति छानबिनको सरकारी अभियानलाई अझ आक्रामक बनाउने अपेक्षा रास्वपा पंक्तिले गरेको छ।
