काठमाडौं । राजधानीमा केही आन्दोलनकारीले संसद भवन वरिपरी आकस्मिक रूपमा हिंसात्मक गतिविधि गर्न सक्ने संकेत देखिएको छ। सुरक्षास्रोतका अनुसार उनीहरूले सामान्य नागरिकको रूप लिएर भवन वरिपरी घरको छत वा वरिपरि उपस्थित भई अचानक आक्रामक गतिविधि गर्ने योजना बनाइरहेका छन्।
आकस्मिक रूपमा टायर, बाकस वा अन्य अवरोधकारी सामग्री सडकमा राखी यातायात अवरुद्ध गर्ने।
एउटै समयमा विभिन्न दिशाबाट गतिविधि गरी सुरक्षाकर्मीलाई विचलित गर्ने र नियन्त्रण कठिन बनाउने।
साधारण यात्रु वा पैदलयात्री झैँ देखिएर भीडमा घुलमिल हुने र अचानक अराजक गतिविधि गर्ने।
सार्वजनिक सम्पत्ति, सरकारी कार्यालय वा यातायात साधनलाई लक्षित गरी एकैपटक तोडफोड गर्ने।
स्रोतका अनुसार उनीहरू सामान्य गतिविधि जस्तो देखाउने तर एकैपटक बाटोमा तोडफोड, आगो सल्काउने जस्ता काम गर्ने योजना तयार पारिरहेका छन्। यसरी आकस्मिक तरिकाले सुरु गरिने गतिविधिले भीड नियन्त्रण गर्न सुरक्षाकर्मीलाई कठिनाइ हुने अनुमान गरिएको छ।
विशेषज्ञहरूले जनाएको छ कि आन्दोलनकारीहरूले सरकारी कार्यालय, प्रहरी स्टेशन र अन्य संवेदनशील क्षेत्रलाई लक्षित गरी आकस्मिक तोडफोड, आगजनी र तनाव सिर्जना गर्ने प्रयास गर्न सक्ने सम्भावना छ। यस प्रकारको बहुआयामिक गतिविधिले सुरक्षा निकायलाई नियन्त्रणमा चुनौती दिने र जनजीवनमा जोखिम उत्पन्न गर्ने संकेत गरिएको छ।
सुरक्षास्रोतले यस्ता योजनाले आम नागरिकको जीवन र सम्पत्तिमा प्रत्यक्ष असर पार्ने भएकाले प्रहरी प्रशासनले संवेदनशील क्षेत्रलाई निरन्तर निगरानीमा राख्नुपर्नेमा जोड दिएका छन्। साथै नागरिकहरूलाई पनि असामान्य गतिविधि देखिए तत्काल नजिकैको प्रहरीलाई जानकारी गराउन आग्रह गरिएको छ।
