पोखरा, ११ वैशाख
पूर्वराजा ज्ञानेन्द्र शाह शुक्रबार अपराह्न पर्यटकीय नगरी पोखरा आइपुगेका छन्। पत्नी कोमल शाहका साथ पोखरा अन्तर्राष्ट्रिय विमानस्थल ओर्लिएका उनलाई राजावादी समर्थकहरूले पञ्चेबाजा र राष्ट्रिय झण्डासहित भव्य स्वागत गरेका हुन्।
भ्रमणलाई आधिकारिक रूपमा 'नितान्त निजी र धार्मिक' भनिए पनि राजनीतिक वृत्तमा भने यसलाई विशेष अर्थका साथ हेरिएको छ। विशेष गरी नेपालको पछिल्लो राजनीतिक परिवर्तन, 'जेन–जी' आन्दोलन र त्यसपछि बनेको नयाँ सरकारको पृष्ठभूमिमा पूर्वराजाको यो सक्रियतालाई राजावादी शक्तिहरूलाई एकीकृत गर्ने र जनमत बुझ्ने रणनीतिका रूपमा विश्लेषण गरिएको छ।
भ्रमणको कार्यतालिका र उद्देश्य विमानस्थलमा पूर्वराजाको स्वागतका लागि गठित मूल समारोह समितिका सदस्यहरूका अनुसार शाह झण्डै दुई हप्ता पोखरामा रहनेछन्। उनी लेकसाइडस्थित नयाँ सोल्टी होटलमा बस्ने व्यवस्था मिलाइएको छ। पोखरा बसाइका क्रममा उनले गण्डकी प्रदेशका विभिन्न धार्मिक स्थलहरूको भ्रमण गर्ने र शुभेच्छुकहरूसँग भेटघाट गर्ने कार्यक्रम छ।
राजावादी नेताहरूका अनुसार यो भ्रमण केवल घुमफिरमा मात्र सीमित रहने छैन। "राजाको आगमनले पोखरा मात्र होइन, देशभरका राष्ट्रवादी शक्तिहरूमा नयाँ उत्साह भरेको छ," स्वागतमा पुगेका एक समर्थकले भने। उनीहरूले यस भ्रमणलाई छरिएर रहेका राजावादीहरूलाई एउटै मञ्चमा ल्याउने कडीका रूपमा लिएका छन्।
सुरक्षा व्यवस्था कडा पूर्वराजाको आगमनलाई ध्यानमा राखेर पोखराको सुरक्षा व्यवस्था निकै कडा पारिएको छ। विमानस्थलदेखि उनी बस्ने होटलसम्म सुरक्षाकर्मीहरूको बाक्लो उपस्थिति रहेको थियो। उनीसँगै सचिवालयका सदस्यहरू र सुरक्षा टिम पनि पोखरा आएका छन्।
यसअघि पनि पटक–पटक पोखरा आइरहने शाहले यसपटक भने राजनीतिक दलका केही असन्तुष्ट नेताहरू र नागरिक समाजका अगुवाहरूसँग पनि अनौपचारिक संवाद गर्न सक्ने स्रोतको दाबी छ। यद्यपि, उनको सचिवालयले भने कुनै पनि राजनीतिक भेटघाटका कार्यक्रमहरू तय नभएको स्पष्ट पारेको छ।
