१८ कात्तिक, काठमाडौं । नेपाली कांग्रेसका महामन्त्री गगनकुमार थापाले पार्टीको १५औं महाधिवेशन आगामी पुस १६ देखि १९ गतेसम्म गर्ने प्रस्ताव राखेका छन्।
पार्टीको जारी केन्द्रीय समिति बैठकमा उनले यो प्रस्ताव प्रस्तुत गरेका हुन्। एक केन्द्रीय सदस्यका अनुसार बैठकको सुरुवातमै गगन थापाले महाधिवेशन समयतालिका प्रस्ताव गर्दै संगठन सुदृढीकरणका लागि त्यसलाई आवश्यक बताए।
यसअघि पार्टीको संस्थापन पक्षीय नेताहरूले भने महाधिवेशन वैशाख अन्तिम सातामा गर्ने प्रस्ताव गरेका थिए। सोमबार नयाँबानेश्वरमा बसेको संस्थापन पक्षीय बैठकले आगामी २५ देखि २८ वैशाखसम्म महाधिवेशन गर्ने निर्णय केन्द्रीय समितिमा पेस गर्ने निर्णय गरेको थियो।
तर संस्थापन इतर पक्षका नेताहरूले प्रतिनिधिसभा निर्वाचनअघि नै नियमित महाधिवेशन गर्नुपर्ने वा त्यसो हुन नसके विशेष महाधिवेशन बोलाउनुपर्ने माग गर्दै आएका छन्। उनीहरूले यसका लागि ५४ प्रतिशत महाधिवेशन प्रतिनिधिको हस्ताक्षर कार्यवाहक सभापति पूर्णबहादुर खड्कालाई बुझाइसकेका छन्।
गगन थापाको यो प्रस्तावले कांग्रेसभित्र महाधिवेशनको मिति र प्रक्रियाबारे नयाँ बहस सुरु भएको छ। पार्टीभित्रको आन्तरिक मतभेदबीच आगामी महाधिवेशनले नेतृत्वको शक्ति सन्तुलन पुनः निर्धारण गर्ने अपेक्षा गरिएको छ।
गगन थापा नेपाली कांग्रेसका महामन्त्री तथा सम्भावित आगामी नेतृत्वका बलिया प्रत्याशी मानिन्छन्। हाल कांग्रेसभित्र संस्थापन र असन्तुष्ट पक्षबीच महाधिवेशनको समयसीमामा मतभेद बढ्दै गएको छ।
