नेपाली राष्ट्रिय क्रिकेट टोलीका लेग स्पिनर सन्दीप लामिछानेले ‘प्याराडाइम टिभी’ नामक युट्युब च्यानलमार्फत आफ्नो चरित्रहत्या हुने गरी तयार गरिएको सामग्रीप्रति तीव्र आपत्ति जनाएका छन्।
फेसबुकमार्फत आफ्नो धारणा सार्वजनिक गर्दै सन्दीपले लेखेका छन्, “तपाईंहरूले आ–आफ्ना पक्षका लागि जसलाई चाहनुहुन्छ, उसैलाई चयन गर्न सक्नुहुन्छ। तर कुनै युट्युब च्यानलको कुर्सीमा बस्दै कसैको जीवनमाथि व्यंग्य गर्नु वा मजाक गर्नु लाजमर्दो हो — तिमीहरू जस्ता तथाकथित ‘इन्फ्लुएन्सर’हरूका लागि।”
उनका अनुसार, प्याराडाइम टिभीले तयार गरेको उक्त सामग्री पूर्ण रूपमा षड्यन्त्रपूर्ण र दुर्भावनायुक्त छ, जसले जानाजानी उनको व्यक्तिगत जीवन, मर्यादा र गोपनीयतालाई क्षति पुर्याउने प्रयास गरेको छ।
सन्दीपले लेखेका छन्, “यो च्यानलले पूर्वनियोजित ढंगले मेरो चरित्र हत्या गर्ने अभियान सञ्चालन गरेको छ, जसले मेरो मानसिक शान्ति र प्रतिष्ठामाथि आघात पुर्याएको छ। म यसलाई गम्भीर आपत्तिजनक कार्यका रूपमा लिन्छु।”
उनले थप लेखेका छन्, “दुर्भावनायुक्त नियतसहित गरिएको यस्तो कदमको उद्देश्य मेरो निर्दोष जीवन र खेलकुद करिअरको दुरुपयोग गर्दै तपाईंहरूको च्यानललाई व्यावसायिक रूपमा लाभ कमाउने हो। फेरि कहिल्यै आफ्नो सीमा ननाघ्नू।”
यसैबीच, नेपाल प्रिमियर लिग (NPL) अन्तर्गतको फ्रेन्चाइज टिम विराटनगर किंग्सले पनि सन्दीपको समर्थन जनाएको छ। टिमका विज्ञप्तिमा भनिएको छ, “सन्दीप केवल नेपाली क्रिकेटको एउटा नाम मात्र होइन — उनी मेहनत, धैर्य र अद्वितीय प्रतिभाको प्रतीक हुन्, जसले एक पुस्तालाई नै प्रेरित गरेका छन्।”
किंग्सले थप जनाएको छ, “कसैको व्यक्तिगत संघर्षलाई मनोरञ्जनका लागि व्यंग्य गर्नु वा सनसनी बनाउनु अत्यन्त दुःखद र खेलभावनाको मर्मविपरीत कार्य हो। हामी टोलीका रूपमा सन्दीपसँग उभिएका छौं — केवल मैदानमा उनका उपलब्धिका कारण होइन, तर मैदानबाहिर पनि उनी जसरी दृढ, संयमी र आफ्नो खेलप्रति समर्पित छन्, त्यसका कारण पनि।”
सन्दीप लामिछानेले आफ्नो चरित्रमाथि भएको आक्रमणप्रति कठोर प्रतिक्रिया दिएका छन् भने विराटनगर किंग्सले पनि उनको समर्थन गर्दै ‘व्यक्तिगत मर्यादाको सम्मान गर्न’ सबैलाई आह्वान गरेको छ।
