भदौ २३ गतेबाट सुरु भएको जेनजी आन्दोलनपछि नेपाल प्रहरीमा व्यापक जिम्मेवारी हेरफेर भएको छ। आन्दोलनपछिको सुरक्षा परिस्थिति व्यवस्थापन र संस्थागत स्थायित्वलाई लक्ष्य गर्दै **चार जना अतिरिक्त महानिरीक्षक (एआईजी)**को जिम्मेवारी फेरबदल गरिएको छ भने चार पदमा बढुवाका लागि सिफारिस गरिएको छ।
घटनाको भोलिपल्ट, भदौ २४ गते, एआईजी दानबहादुर कार्कीलाई मानव स्रोत विभागबाट काठमाडौं उपत्यका प्रहरी कार्यालयमा सरुवा गरिएको थियो। त्यसपछि **प्रदेश समन्वय विभागमा कार्यरत एआईजी डा. मनोजकुमार केसीलाई केन्द्रीय अनुसन्धान ब्युरो (सीआईबी)**मा पठाइयो।
त्यसैगरी, कार्य विभागमा रहेका एआईजी सिद्धिविक्रम शाहलाई राष्ट्रिय प्रहरी प्रशिक्षण प्रतिष्ठानमा सरुवा गरिएको छ भने अपराध अनुसन्धान विभागका एआईजी राजन अधिकारीलाई मानव स्रोत विभागको जिम्मेवारी दिइएको छ। असोज १२ गतेको मन्त्रिपरिषद् निर्णयअनुसार, यी दुवै अधिकारीले नयाँ जिम्मेवारी सम्हालेका छन्।
यस हेरफेरपछि कार्य विभाग, अपराध अनुसन्धान विभाग, प्रशासन विभाग र प्रदेश समन्वय विभाग अहिले रिक्त छन्। यी विभागमा नयाँ एआईजीहरू पदस्थापन गर्न तयारी भइरहेको छ।
बढुवाका लागि सिफारिसमा परेका चार डीआईजीहरूमा —
सुशिल सिंह राठौर (प्रशासन विभाग)
उमाप्रसाद चतुरवेदी (मधेस प्रदेश प्रहरी प्रमुख)
हिमालय कुमार श्रेष्ठ (अख्तियार दुरुपयोग अनुसन्धान आयोग)
डम्बरबहादुर विक (सुदूरपश्चिम प्रदेश प्रहरी प्रमुख) —
समावेश छन्। उनीहरूको बढुवा निर्णय आगामी मन्त्रिपरिषद् बैठकले गर्नेछ।
यसअघि नै सरकारले काठमाडौं र ललितपुरका प्रहरी प्रमुखहरू पनि हेरफेर गरिसकेको छ। काठमाडौं प्रहरी प्रमुखमा एसएसपी रमेश थापा र ललितपुर प्रहरी प्रमुखमा एसएसपी होबिन्द्र बोगटी नियुक्त भएका छन्।
स्रोतका अनुसार, जेनजी आन्दोलनपछिको अवस्थालाई ध्यानमा राख्दै काठमाडौंमा क्षमतावान र अनुभवसंपन्न अधिकारीहरूलाई छानिछानी जिम्मेवारी दिइएको छ। बृत्तदेखि विभिन्न प्रहरी कार्यालयमा समेत व्यापक अधिकारी हेरफेर गरिएको छ। हालै मात्र सातदोबाटोका डीएसपी रामकुमार यादवलाई तानेर त्यहाँ पूर्णिमा चन्दलाई खटाइएको छ।
चन्द यसअघि काठमाडौं प्रहरी परिसरमा कार्यरत थिइन्, जबकि यादवलाई उपत्यका प्रहरी कार्यालय, रानीपोखरीमा खटाइएको छ।
