पोखरा:गण्डकी प्रदेशमा हालैका दिनमा आएको विनाशकारी बाढी, पहिरो र मनसुनजन्य विपद्मा नागरिकको ज्यान बचाउन सशस्त्र प्रहरी बल नेपालले निर्वाह गरेको साहसिक भूमिकाको चौतर्फी उच्च प्रशंसा भइरहेको छ। सशस्त्र प्रहरी बल नेपाल नं. ४ मुक्तिनाथ बाहिनी मुख्यालय (गण्डकी प्रदेश) का बाहिनीपति, सशस्त्र प्रहरी नायब महानिरीक्षक (डीआईजी) प्रवीण कँडेलको प्रत्यक्ष कमान्डमा विपद्मा फसेका सयौं नागरिकको सफल उद्धार गरिएको छ।
प्रदेशका विभिन्न जिल्ला-विशेषगरी म्याग्दी, बागलुङ, पर्वत र मनाङलगायतका क्षेत्रमा बाढी र पहिरोले मच्चाएको वितण्डाका बीच सशस्त्र प्रहरी अग्रपंक्तिमा खटिएको थियो। कालीगण्डकी लगायतका नदीमा आएको बाढीले बगाएका पुलहरू, अवरुद्ध पोखरा-बागलुङ राजमार्ग सुचारु गर्न, बाढीको चपेटामा परेकाहरूको सकुशल उद्धार गर्न र जोखिममा परेका सयौं घरपरिवारलाई सुरक्षित स्थानमा स्थानान्तरण गर्न सशस्त्रको विपद् व्यवस्थापन टोलीले ज्यानको बाजी लगाएर काम गरेको थियो।
विपद्को यो संवेदनशील घडीमा उत्कृष्ट नेतृत्व, शीघ्र निर्णय क्षमता र चुस्त व्यवस्थापन प्रदर्शन गरेको भन्दै स्थानीय बासिन्दा, प्रदेश सरकार र सरोकारवाला निकायहरूले डीआईजी कँडेल र सशस्त्र प्रहरी परिवारको कार्यको उच्च प्रशंसा गरेका छन्।
आफ्नो टिमले पाएको यस प्रशंसालाई प्रेरणाको रूपमा लिँदै डीआईजी प्रवीण कँडेलले सशस्त्र प्रहरी सधैं नागरिकको जिउधनको रक्षाका लागि समर्पित रहेको बताउनुभयो। उद्धार कार्यमा अहोरात्र खटिने सुरक्षाकर्मीहरूको उच्च मनोबलको सराहना गर्दै उहाँले भन्नुभयो, "नागरिकको सुरक्षा हाम्रो पहिलो दायित्व हो। आगामी दिनहरूमा आइपर्न सक्ने जस्तोसुकै प्राकृतिक विपद्मा पनि हाम्रा उपलब्ध प्राविधिक स्रोतसाधन र जनशक्तिलाई अझ तीव्र, आधुनिक र प्रभावकारी रूपमा परिचालन गर्न हामी दृढ संकल्पित छौं।"
डीआईजी कँडेलका अनुसार विपद्को समयमा 'एक मिनेट' को पनि ठूलो महत्व हुने भएकाले प्रदेशभरका सम्पूर्ण युनिटहरूलाई अत्याधुनिक उद्धार सामग्री (मोटरबोट, लाइफ ज्याकेट, डोरी लगायत) सहित चौबीसै घण्टा 'रेडी टु मुभ' (तत्काल परिचालन हुने) अवस्थामा राखिएको छ। विपद्मा परेका नागरिकले सशस्त्र प्रहरीको हटलाइन नम्बर १११४ मा सम्पर्क गर्नासाथ उद्धार टोली घटनास्थलमा पुग्ने संयन्त्रलाई थप चुस्त बनाइएको छ।
यसपटकको मनसुनजन्य विपद् प्रतिकार्यमा सशस्त्र प्रहरीले नेपाली सेना, नेपाल प्रहरी र स्थानीय प्रशासनसँग गरेको उत्कृष्ट समन्वयले जनधनको थप क्षति हुनबाट जोगाएको छ। सशस्त्र प्रहरीको यो अहोरात्रको सेवाभाव र डीआईजी कँडेलको आगामी दिनका लागि गरिएको सशक्त प्रतिबद्धताले गण्डकी प्रदेशका नागरिकमा विपद्का बेला राज्य र सुरक्षा संयन्त्रप्रतिको विश्वासलाई थप मजबुत बनाएको छ।
