काठमाडौं, २७ फागुन।२१ फागुनमा सम्पन्न प्रतिनिधि सभा निर्वाचनको नतिजासँगै नेपालमा ६ वटा राजनीतिक दलले राष्ट्रिय दलको मान्यता प्राप्त गरेका छन्। यसमध्ये एउटा नयाँ दल राष्ट्रिय दलको रूपमा उदाएको छ भने पाँच दलले आफ्नो पुरानै हैसियत कायम राख्न सफल भएका छन्।
यसपटकको निर्वाचनबाट श्रम संस्कृति पार्टी पहिलो पटक राष्ट्रिय दल बनेको छ। धरानका मेयर हर्क साम्पाङको नेतृत्वमा रहेको यो पार्टीले प्रत्यक्षतर्फ ३ सिट जित्नुका साथै समानुपातिकतर्फ ३ प्रतिशत थ्रेसहोल्ड पार गर्दै राष्ट्रिय दलको मान्यता प्राप्त गरेको हो।
त्यस्तै, यसअघिको प्रतिनिधि सभामा पनि राष्ट्रिय दल रहेका पाँच दलले भने यसपटक पनि आफ्नो राष्ट्रिय हैसियत कायम राखेका छन्। ती दलहरूमा राष्ट्रिय स्वतन्त्र पार्टी, नेपाली कांग्रेस, नेपाल कम्युनिस्ट पार्टी (एमाले), नेपाल कम्युनिस्ट पार्टी (माओवादी केन्द्र) र राष्ट्रिय प्रजातन्त्र पार्टी रहेका छन्।
यी दलहरू अघिल्लो पटकको प्रतिनिधि सभा विघटनअघि पनि राष्ट्रिय दलकै रूपमा स्थापित थिए। यसपटकको निर्वाचनले भने नेपाली राजनीतिमा नयाँ शक्ति प्रवेश गराउँदै शक्ति सन्तुलनमा केही परिवर्तनको संकेत देखाएको विश्लेषकहरू बताउँछन्।
विशेषगरी नयाँ दलको उदय र पुराना दलको प्रतिस्पर्धाले आगामी दिनमा संसदको शक्ति समीकरण र सरकार गठन प्रक्रियामा पनि महत्वपूर्ण प्रभाव पार्ने अनुमान गरिएको छ।
