धादिङ । रसुवा-भोटेकोशी क्षेत्रमा आएको विनाशकारी बाढीबाट प्रभावित नागरिकको उद्धार, राहत तथा पुनःस्थापनामा नेपाल तरुण दलले देखाएको सक्रिय भूमिकाको धादिङ तरुण दलले उच्च प्रशंसा गरेको छ। विपद्को कठिन घडीमा राजनीतिक स्वार्थभन्दा माथि उठेर युवाहरू स्वयंसेवकका रूपमा प्रभावित क्षेत्रमा खटिएको भन्दै तरुण दलले मानवीय सेवाको उदाहरण प्रस्तुत गरेको जनाएको छ।
यसैबीच, धादिङबाट निर्वाचित सांसद आशिका तामाङका पछिल्ला सार्वजनिक गतिविधि, अभिव्यक्ति तथा विपद् प्रभावित क्षेत्रमा देखिएको व्यवहारप्रति धादिङ तरुण दलले गम्भीर आपत्ति जनाउँदै संयमित र जिम्मेवार बन्न चेतावनी दिएको छ।
धादिङ तरुण दलका अध्यक्ष शंकर धमलाले विपद्को समयमा जनताको पीडा कम गर्नुपर्ने बेला अनावश्यक विवाद, आरोप–प्रत्यारोप वा व्यक्तिगत प्रचारमा केन्द्रित हुने गतिविधि स्वीकार्य नहुने बताएका छन्।
उनले भने, “विपद्को समयमा राजनीति गर्ने होइन, जनताको दुःखमा साथ दिने हो। प्रभावित क्षेत्रमा जाने हो भने श्रमदान गर्नुस्, राहत वितरणमा हातेमालो गर्नुस्, उद्धारमा सहयोग गर्नुस्। तर विपद्लाई व्यक्तिगत प्रचार वा स्टन्टको माध्यम नबनाउनुस्।”
विपद्मा तरुण दलको अग्रपंक्तिको भूमिका
रसुवा, नुवाकोट, धादिङलगायत बाढी तथा पहिरो प्रभावित क्षेत्रमा उद्धार, राहत, स्वयंसेवा, खाद्यान्न तथा अत्यावश्यक सामग्री व्यवस्थापनमा विभिन्न तहका तरुण युवाहरू सक्रिय रहँदै आएका छन्।
विपद्को समयमा राज्यका निकाय, स्थानीय जनप्रतिनिधि, सुरक्षा निकाय, स्वयंसेवी संस्था र राजनीतिक संगठनबीच सहकार्य आवश्यक हुने भन्दै धादिङ तरुण दलले तरुण दलका स्वयंसेवकहरूले संकटको समयमा देखाएको साहस, समर्पण र मानवीय सेवाको भावना प्रशंसनीय रहेको जनाएको छ।
तरुण दलले राजनीतिक विचार फरक भए पनि विपद्को समयमा सबै एकजुट भएर पीडित नागरिकको जीवन बचाउने र उनीहरूको पुनःस्थापनामा केन्द्रित हुनुपर्नेमा जोड दिएको छ।
‘जनताको दुःखमा राजनीति होइन, मानवीयता चाहिन्छ’
अध्यक्ष धमलाले सार्वजनिक पदमा रहेका व्यक्तिबाट थप जिम्मेवार, संयमित र मर्यादित व्यवहारको अपेक्षा गरिनु स्वाभाविक भएको बताएका छन्।
“हामी सबै जनप्रतिनिधिको सम्मान गर्छौं। तर जनताको मतबाट निर्वाचित भएपछि जनताको दुःखमा जिम्मेवारी पनि देखिनुपर्छ। विपद् प्रभावित क्षेत्रमा गएर स्थानीय जनप्रतिनिधि, प्रशासन वा उद्धारमा खटिएका व्यक्तिसँग विवाद सिर्जना गर्नुको सट्टा सहकार्यको वातावरण बनाउनुपर्छ,” धमलाले भने।
धादिङ तरुण दलले सांसद तामाङलाई विवाद र सामाजिक सञ्जालको चर्चाभन्दा माथि उठेर वास्तविक राहत, उद्धार र पुनःस्थापनाको अभियानमा सहभागी हुन आग्रह गरेको छ।
“पीडितको आँसुमा प्रचार होइन, मल्हम चाहिन्छ। संकटमा भाषण होइन, सहयोग चाहिन्छ। विपद्को मैदानमा आरोप होइन, सहकार्य चाहिन्छ,” धादिङ तरुण दलले स्पष्ट सन्देश दिएको छ।
विपद्को समयमा अग्रपंक्तिमा खटिएका सुरक्षा निकाय, स्थानीय तह, स्वास्थ्यकर्मी, स्वयंसेवक तथा नेपाल तरुण दलका सम्पूर्ण युवाप्रति धादिङ तरुण दलले उच्च सम्मान र आभार व्यक्त गरेको छ। भिडियो सहित
https://youtube.com/shorts/DM2fYt1AyKE?si=qHgtLokU2sxeSB-7
