त्रिभुवन अन्तर्राष्ट्रिय विमानस्थलको प्रस्थान कक्षमा दैनिक हजारौं युवाहरू सुनौलो भविष्यको खोजीमा देश छाड्दै गर्दा, एकजना ऊर्जाशील युवा भने आफ्नै माटोमा पसिना बगाउने दृढ अठोटका साथ फर्किन्छन्। देशको विषम परिस्थिति र चरम निराशाका बीच पनि स्वदेशमै केही गर्न सकिन्छ भन्ने हिम्मत बोकेर दक्षिण कोरियाबाट फर्किएका लमजुङ, राइनस नगरपालिका–४ का जीवन खड्का अहिले सिङ्गो युवा पुस्ताका लागि प्रेरणाको गतिलो स्रोत बनेका छन्। उनले आफ्नो ६ वर्षे कोरियाली अनुभव र सीपलाई सदुपयोग गर्दै चितवनको भरतपुर महानगरपालिका–१०, कालिका चोकमा ४० लाख रूपैयाँको लगानीमा 'गौंथली रेष्टुरेण्ट' सञ्चालनमा ल्याएका छन्।
बुधबार एक विशेष समारोहका बीच चितवन चेम्बर अफ कमर्सका उपाध्यक्ष रुवीन रामुदामुले उक्त रेष्टुरेण्टको औपचारिक उद्घाटन गरेका हुन्। उद्घाटनको क्रममा उनले वर्तमान समयमा व्यवसाय सञ्चालन गर्नु आफैंमा एउटा ठूलो चुनौती रहेको यथार्थ औंल्याउँदै, खड्काजस्ता युवाले देखाएको अठोटको खुलेर प्रशंसा गरे। देशमा बढ्दो डरलाग्दो युवा पलायनलाई रोक्न यस्ता उद्यमशीलताले महत्त्वपूर्ण भूमिका खेल्ने रामुदामुको भनाइ थियो। जीवनको यो शाहसिक कदमले ती हजारौं युवाहरूलाई एउटा दरिलो सन्देश दिएको छ, जो अवसरको अभाव देखाउँदै बिदेसिने तर्खरमा छन्।
कोरियामा रहँदा हस्पिटालिटी क्षेत्रमा बटुलेको सुक्ष्म ज्ञानलाई नेपालमै प्रयोग गर्ने जीवनको सपना अब 'गौंथली रेष्टुरेण्ट' मार्फत विपनामा परिणत भएको छ। उनको रेष्टुरेण्टमा यथेष्ट पार्किङ सुविधासहित इन्डियन, चाइनिज, कोरियन, कन्टिनेन्टल र विशुद्ध नेपाली परिकारहरूको स्वाद लिन सकिन्छ। बार, क्याबिन र मिनी हललगायतका आधुनिक सुविधाहरूले सुसज्जित यस रेष्टुरेण्टले प्रत्यक्ष रूपमा आधा दर्जन व्यक्तिलाई रोजगारी समेत प्रदान गरेको छ। कोरियामा राम्रै आम्दानी भए तापनि आफ्नै देशको माटोमा पसिना बगाउँदा मिल्ने आत्मसन्तुष्टि र स्वदेशमै रहेर केही नयाँ सिर्जना गर्ने हुटहुटीले आफूलाई नेपाल फर्काएको उनी गर्वका साथ सुनाउँछन्।
इच्छाशक्ति र अठोट हुने हो भने आफ्नै देशमा पनि उत्कृष्ट प्रतिफल र सफलता हासिल गर्न सकिन्छ भन्ने ज्वलन्त उदाहरण हुन् जीवन। तर, युवाहरूलाई उद्यममा टिकाइराख्न र उनीहरूको ऊर्जाशील क्षमताको उचित व्यवस्थापन गर्न राज्यले लगानीको पूर्ण सुरक्षित वातावरण निर्माण गर्नुपर्ने उनको जोडदार माग छ। जबसम्म देशमा युवा जनशक्तिलाई उचित नेतृत्व र व्यवस्थापकीय अवसर दिइँदैन, तबसम्म राष्ट्रको आर्थिक रूपान्तरण सम्भव छैन। विदेश जाने चक्करमा भौंतारिरहेका सम्पूर्ण युवाहरूलाई सानै लगानीबाट भए पनि आफ्नै देशमा भविष्यको जग बसाल्न उनले विशेष आग्रह गरेका छन्। उनको यो पहलले समग्र युवा पुस्तामा नयाँ आशाको सञ्चार मात्र गराएको छैन, नीति निर्माण तहमा बस्नेहरूलाई पनि युवाहरूका लागि लगानी र अवसरको ढोका खोल्न झकझकाएको छ।
