काठमाडौं । सञ्चार तथा सूचना प्रविधिमन्त्री जगदिश खरेलले करारमा कार्यरत सरकारी कर्मचारीलाई सामाजिक सुरक्षा कोषको दायरामा ल्याउने सरकारी तयारी भएको बताएका छन्।
आइतबार काठमाडौंको सञ्चारग्रामस्थित न्यूनतम पारिश्रमिक निर्धारण समितिको कार्यालयमा अनुगमनका क्रममा मन्त्री खरेलले करारमा कार्यरत कर्मचारीहरू राज्यको सेवामा समान योगदान दिइरहेका भएकाले उनीहरूलाई पनि सामाजिक सुरक्षा कोषमा समेटिनु अत्यावश्यक भएको स्पष्ट गरे।
सरकारका प्रवक्ता समेत रहेका मन्त्री खरेलले अन्य स्थायी कर्मचारीहरूले पाउने सुविधा—पेन्सन, बीमा तथा अन्य सुरक्षात्मक व्यवस्थाबाट करार कर्मचारीहरू वञ्चित हुनु अन्यायपूर्ण रहेको उल्लेख गर्दै, “अब करार कर्मचारीहरूलाई पनि सो कोषमा समावेश गर्न तत्काल गृहकार्य सुरु हुनेछ,” भन्ने प्रतिबद्धता व्यक्त गरे।
उनले पत्रकार तथा सञ्चारकर्मीहरूलाई समेत सामाजिक सुरक्षा कोषको दायरामा ल्याउने कार्यलाई सरकारले प्राथमिकताका साथ अघि बढाइरहेको जानकारी दिए। मन्त्री खरेलका अनुसार, सरकार अनौपचारिक क्षेत्रमा कार्यरत श्रमिकहरूलाई समेत सो कोषमा समेट्ने दिशामा सक्रिय रूपमा काम गरिरहेको छ।
(Ecopoli News / काठमाडौं)
