स्रोतका अनुसार सोमबार मध्यरातसम्म प्रधानमन्त्री कार्कीले गृह, प्रहरी, सशस्त्र प्रहरी, राष्ट्रिय अनुसन्धान विभाग र सेनाका प्रमुखहरूसँग लामो बैठक गरेकी थिइन्। बैठकमा तत्काल कुनै निर्णय नभए पनि परिस्थिति गम्भीर रूपमा विश्लेषण गरिएको बताइन्छ।
यसअघि ‘हामी नेपाल’ समूहका सुदन गुरुङसहितका अगुवाहरूले ओली र लेखकविरुद्ध किटानी जाहेरी दर्ता गर्न प्रयास गरेका थिए। तर, प्रहरी परिसरले जाहेरी नलिएपछि गृहमन्त्री ओमप्रकाश अर्यालले प्रहरी प्रमुख चन्द्रकुवेर खापुङसँग परामर्श गरेका थिए। त्यसपछि प्रधानमन्त्री कार्कीले पनि सम्बन्धित सबै सुरक्षा निकायका प्रमुखहरूलाई बोलाएर छलफल गरेकी थिइन्।
छलफलमा गृहमन्त्री अर्याल, आईजीपी खापुङ, सशस्त्र प्रहरी प्रमुख राजु अर्याल, राष्ट्रिय अनुसन्धानका प्रमुख टेकेन्द्र कार्की, गृहसचिव रामेश्वर दंगाल र सेनापति अशोकराज सिग्देल सहभागी थिए। बैठकमा ओली र लेखक पक्राउको सम्भावित प्रभावबारे विस्तृत सुरक्षा मूल्याङ्कन गरिएको बताइन्छ।
सुरक्षा निकायको ब्रीफिङ अनुसार तत्काल गिरफ्तारीका कदमले राजनीतिक तनाव र सडकस्तरको भिडन्त बढ्न सक्ने जोखिम भएकाले सरकार सावधानीपूर्वक अघि बढ्न खोज्दैछ।
त्यसैबीच, काठमाडौं महानगरका मेयर बालेन शाहलाई पनि समावेश गर्ने गरी समानान्तर रूपमा भइरहेको छलफलले परिस्थिति झनै संवेदनशील बनेको छ। बालेनले ९ असोजमा प्रधानमन्त्री कार्कीलाई भेटेर ओली र लेखकविरुद्ध कदम चाल्न सुझाव दिएका थिए। त्यसयता आन्दोलनकारीहरूले सरकारलाई सात दिनभित्र निर्णय गर्न अल्टिमेटम दिएका छन्।
प्रधानमन्त्री कार्की अहिले पनि निरन्तर छलफलमा छिन् भने सुरक्षा संयन्त्र उच्च सतर्कतामा रहेको सरकारी स्रोतहरूले जनाएका छन्।
(यो समाचार सार्वजनिक रूपमा उपलब्ध विभिन्न स्रोत र घटनाक्रमका आधारमा तयार गरिएको हो।)
२१ असोज २०८२, मङ्गलबार ०१:१० मा प्रकाशित
