बेइजिङको च्याङआन मार्गले हालै इतिहासकै भव्य दृश्य देख्यो—चीनको ८० औं विजय दिवस सैन्य परेड। दोस्रो विश्वयुद्धमा जापानमाथिको विजय स्मरणार्थ आयोजना गरिएको यो परेड केवल स्मरण वा उत्सव मात्र थिएन; यसले चीनले विश्व समुदायलाई दिएको एउटा गहिरो राजनीतिक र कूटनीतिक सन्देश बोकेको थियो। अत्याधुनिक हाइपरसोनिक मिसाइल, कृत्रिम बुद्धिमत्ताले सञ्चालन गर्ने ड्रोन, युद्धक रोबोट र समुद्री गहिराइमा चल्ने ड्रोन्सको प्रदर्शनले चीन अब केवल शान्ति र विकासको वकालत गर्ने राष्ट्र होइन, बलियो सैन्य र सुरक्षात्मक घेरामा उभिएको शक्ति हो भन्ने देखायो।
यस भव्य परेडलाई अन्तर्राष्ट्रिय रंग दिने काम रुसका राष्ट्रपति भ्लादिमिर पुटिन र उत्तर कोरियाका नेता किम जोंग-उनले गरे। उनीहरूको उपस्थितिले चीनसँगको सम्बन्धलाई अझ नजिक ल्याउँदै पश्चिमी शक्तिहरूप्रति प्रत्यक्ष सन्देश पठायो। अमेरिका, जापान र युरोपका राष्ट्रहरू भने यो अवसरबाट टाढा रहे, जसलाई धेरैले उनीहरूको प्रभाव क्षीण हुँदै गएको संकेतका रूपमा व्याख्या गरे। युरोपेली संघले यसलाई “प्रत्यक्ष चुनौती” को रूपमा अर्थ्यायो भने पश्चिमी विश्लेषकहरूले यसलाई अमेरिकी नेतृत्व अन्त्य गर्न चीनले देखाएको वैकल्पिक परिदृश्यको रूपमा मूल्यांकन गरे।
अमेरिकी राष्ट्रपति डोनाल्ड ट्रम्पले सामाजिक सञ्जालमार्फत चीन, रुस र उत्तर कोरियाको संयुक्त उपस्थितिलाई “अमेरिकाविरुद्ध साजिश” भनेका छन्। उनको अभिव्यक्तिले पश्चिम र चीनबीचको तनावलाई अझ प्रष्ट बनाएको छ। तर आलोचकहरूको नजरमा, यो परेड चीनको भित्री सन्देश पनि हो। अर्थतन्त्रको चुनौती, बेरोजगारी, र सैन्य संरचनामा फैलिएको भ्रष्टाचारविरुद्धको अभियानबीच यो परेडले “राजनीतिक नियन्त्रण हाम्रो हातमा छ, प्रणाली बलियो छ” भन्ने सन्देश भित्रतिर पठायो।
यसैले, चीनको यो अहिलेसम्मकै ठूलो र शक्तिशाली सैन्य परेड केवल शक्ति प्रदर्शनमा सीमित रहेन। यसले विश्वव्यापी सत्ता सन्तुलनलाई पुनः परिभाषित गर्ने संकेत दियो। चीन अब केवल सहभागी होइन, नयाँ विश्वव्यवस्थाको चालक बन्ने अडानमा उभिएको छ र पश्चिमी शक्ति केन्द्रहरूले यसलाई सामान्य उत्सव होइन, प्रत्यक्ष रणनीतिक चुनौतीका रूपमा लिनुपर्ने अनिवार्यता पैदा भएको छ।
