काठमाडौँ । राष्ट्रिय स्वतन्त्र पार्टी (रास्वपा) ले मधेश प्रदेशमा चुलिएको आन्तरिक विवाद समाधान गरी रोकिएका जिल्ला अधिवेशनहरू सम्पन्न गराउन विशेष टोली परिचालन गरेको छ।
चितवनमा पार्टीको प्रथम महाधिवेशन सम्पन्न भइसक्दा पनि मधेश प्रदेशका आठमध्ये पर्सा बाहेक सात जिल्लामा अझै अधिवेशन हुन सकेको छैन। यही विवाद सल्टाउन भदौ ५ गतेको केन्द्रीय समिति बैठकले सहमहामन्त्री हरि ढकालको संयोजकत्वमा 'मधेश प्रदेश संगीठन अडिट समिति' गठन गरेको थियो।
किन अड्कियो मधेशमा अधिवेशन?
रास्वपा नेताहरूका अनुसार मधेश प्रदेशमा निर्वाचित सांसद र पार्टी सङ्गठनबीचको शक्ति सङ्घर्ष तथा रस्साकस्सीका कारण जिल्ला अधिवेशनहरू रोकिएका हुन्।
- महाधिवेशनमा पुराना प्रतिनिधि: महाधिवेशन अवधिभर सात जिल्लामा अधिवेशन हुन नसकेपछि पर्सा बाहेकका जिल्लाबाट पुराना प्रतिनिधिहरूले नै चितवन महाधिवेशनमा भाग लिएका थिए।
- पर्साको नजिर: पर्सामा समेत सांसद र सङ्गठनबीचको विवादले गर्दा तोकिएको भन्दा एक दिन ढिलो गरी मात्र अधिवेशन सम्पन्न भएको थियो, जहाँ हरि पन्त जिल्ला सभापतिमा निर्वाचित भएका थिए।
स्थलगत अध्ययन र भावी रणनीति
सहमहामन्त्री हरि ढकाल नेतृत्वको ६ सदस्यीय समितिले पर्साबाट सुरु गरेर बारा, रौतहट, सर्लाही, धनुषा (जनकपुर) र महोत्तरीमा छलफल सम्पन्न गरिसकेको छ। सोमबार सप्तरीमा अन्तिम छलफल सकेर टोली बुधबार काठमाडौँ फर्किने तयारीमा छ।
| समितिको संरचना | पदाधिकारी/सदस्य |
| संयोजक | सहमहामन्त्री हरि ढकाल |
| सदस्यहरू | सुरेन्द्र चौधरी, अशोककुमार चौधरी, प्रमोद न्यौपाने, जगदीश खरेल, पुनम अग्रवाल |
अबको कदम:
काठमाडौँ फर्किएपछि समितिले विवादको मुख्य कारण र समाधानका उपाय समेटेर केन्द्रीय समितिलाई प्रतिवेदन बुझाउनेछ। लगत्तै सभापति रवि लामिछाने आफैँ मधेश प्रदेश पुगेर समितिको सिफारिसका आधारमा विवाद समाधान गरी रोकिएका सातै जिल्लामा अधिवेशन गराउने पहल लिनेछन्।
२९ भदौ २०८३, सोमबार ०७:०७ मा प्रकाशित
