रविन्द्र कट्टेल - नेपाली कांग्रेसको १५औँ महाधिवेशनको सरगर्मी बढ्दै गर्दा लमजुङ प्रदेश सभा ‘क’ को सभापति पदमा विजय गुरुङले आफ्नो बलियो उम्मेदवारी घोषणा गरेका छन्। पार्टीको वैचारिक धरातल र सांगठनिक आवश्यकतालाई गहिरोसँग बुझेका गुरुङले आफ्नो अभियानलाई केवल पदको प्रतिस्पर्धामा मात्र सीमित नराखी पुस्तान्तरण र पुस्ताबीचको सहकार्यको एउटा गम्भीर वैचारिक बहसका रूपमा अगाडि बढाएका छन्।
राष्ट्रियता, लोकतन्त्र र समाजवादको आधारभूत सिद्धान्तलाई आत्मसात् गरेको कांग्रेसभित्र पछिल्लो समय रूपान्तरणको आवाज उठिरहेको सन्दर्भमा गुरुङको उम्मेदवारीले विशेष अर्थ राख्दछ। उनले अघि सारेको “अग्रजलाई सम्मान र उचित स्थान, युवालाई प्रोत्साहन” भन्ने मूल मन्त्रले लामो समय पार्टीमा रगतपसिना बगाएका पुराना नेताहरूको ऐतिहासिक योगदान र वर्तमानको चुनौती चिर्न सक्ने युवा पुस्ताको ऊर्जालाई एउटै लयमा जोड्ने संकल्प बोकेको छ। यसका साथै “सत्य र न्याय, सपना सफल पारौँ” भन्ने अभियानले राजनीतिलाई निष्ठा, मूल्य र जवाफदेहितासँग बाँध्ने उनको स्पष्ट दृष्टिकोणलाई प्रतिविम्बित गर्दछ।
जनताको सार्वभौमसत्ता, विधिको शासन, स्वतन्त्र न्यायपालिका र सामाजिक न्यायजस्ता कांग्रेसका शाश्वत लोकतान्त्रिक मूल्यहरूलाई जनस्तरसम्म पुर्याउन बलियो र एकताबद्ध संगठनको विकल्प छैन। यही यथार्थलाई मनन गर्दै प्रदेश सभा ‘क’ को संरचनालाई थप गतिशील बनाउन गुरुङले सांगठनिक सुदृढीकरणलाई आफ्नो प्रमुख एजेन्डा बनाएका छन्। अग्रजहरूको मार्गदर्शनबिना पार्टीले बाटो बिराउने र युवाहरूको सक्रियताविना संगठनले गति लिन नसक्ने तथ्यलाई स्थापित गर्दै उनले पार्टीभित्र आन्तरिक एकताको शंखघोष गरेका हुन्।
नेपाली कांग्रेसको आन्तरिक लोकतन्त्र यसको संगठनात्मक जीवनको प्राण हो। तसर्थ, प्रदेश सभा ‘क’ को आसन्न नेतृत्व चयन प्रक्रिया अब केवल व्यक्ति छान्ने कर्मकाण्डमा मात्र सीमित छैन; यो समग्र संगठनको आगामी दिशा, कार्यशैली र स्थानीय मुद्दाहरूको सशक्त उठान गर्ने वैचारिक अनुष्ठानसमेत हो। आसन्न लोकतान्त्रिक अभ्यासमा प्रतिनिधिहरूले उम्मेदवारका दृष्टिकोण, जनस्तरका आवश्यकता सम्बोधन गर्ने खाका र पार्टीप्रतिको समर्पणलाई कसीमा राखेर ऐतिहासिक निर्णय लिनेछन्। संघीय लोकतान्त्रिक गणतन्त्रका उपलब्धिहरूलाई संस्थागत गर्दै कांग्रेसलाई अझै जनमुखी, सहभागितामूलक र पुस्ताबीचको सहकार्यमा आधारित मजबुत शक्ति बनाउने चुनौती र अवसर अब लमजुङ प्रदेश सभा ‘क’ को नयाँ नेतृत्वको काँधमा आइपुगेको छ।
— इकोपोलि न्युज (Ecopoli News)
