सङ्घीय संसद् मातहतका विभिन्न नौ वटा संसदीय समितिको बैठक आज एकै दिन बस्दै छन्। प्रतिनिधिसभाको बैठक भदौ ८ गतेका लागि तय भएको र राष्ट्रियसभाको बैठक शुक्रबार बस्ने भएपछि संसद्का समितिहरूले आज विभिन्न महत्वपूर्ण विषयमा छलफल अघि बढाउन लागेका हुन्।
आज बस्ने समितिका बैठकमा अर्थतन्त्र, पर्यटन, कृषि, पूर्वाधार, सुशासन, शिक्षा–स्वास्थ्य, वैदेशिक सहायता तथा विधायिकी अन्तरसम्बन्ध जस्ता जनसरोकार र राष्ट्रिय महत्वका विषय समेटिएका छन्।
बिहान ११ बजे अर्थसमितिको बैठक बस्दै छ। बैठकमा ‘नेपाल राष्ट्र बैंक ऐन, २०५८ लाई संशोधन गर्न बनेको विधेयक’ माथि दफावार छलफललाई निरन्तरता दिइनेछ। छलफलमा अर्थमन्त्री तथा अर्थसचिवलाई समेत आमन्त्रण गरिएको छ।
त्यस्तै, बिहान ११ बजे नै अन्तर्राष्ट्रिय सम्बन्ध तथा पर्यटन समितिको बैठक बस्नेछ। बैठकमा ‘पर्यटन विधेयक, २०८१’ का सम्बन्धमा होटल एसोसिएसन नेपाललगायत पर्यटन क्षेत्रका सरोकारवाला निकायसँग छलफल गरिनेछ।
उद्योग तथा वाणिज्य र श्रम तथा उपभोक्ता हित समितिको बैठक बिहान १० बजे बस्दै छ। उक्त बैठकमा समितिमा प्राप्त विभिन्न उजुरीका विषयमा छलफल गरिने कार्यसूची छ।
कृषि क्षेत्रसँग जोडिएको महत्वपूर्ण विषयमा पनि आज छलफल हुँदैछ। कृषि तथा प्राकृतिक स्रोत समितिको बिहान १० बजेको बैठकमा नेपालमा जैविक तथा प्राङ्गारिक मलको उत्पादन, भण्डारण र बिक्री–वितरणको अवस्था सुधार गर्दै कृषि उत्पादनमा असर नपर्ने गरी रासायनिक मलको प्रयोग क्रमशः घटाउने विषयमा उत्पादकहरूसँग छलफल गरिनेछ।
यसैगरी, पूर्वाधार विकास समितिको बैठकमा बागमती सभ्यता एकीकृत विकास समिति अन्तर्गतको बागमती ब्युटिफिकेसन आयोजनाबारे छलफल हुनेछ। बैठक बिहान १० बजे बस्नेछ।
सुशासन र भ्रष्टाचार नियन्त्रणसँग प्रत्यक्ष जोडिएको विषयमा पनि समितिले छलफल गर्दैछ। राज्य व्यवस्था तथा सुशासन समितिको बिहान ११ बजेको बैठकमा अख्तियार दुरुपयोग अनुसन्धान आयोगका पदाधिकारीसँग आयोगको काम–कारबाहीलगायतका विषयमा छलफल गरिनेछ।
त्यस्तै, शिक्षा, स्वास्थ्य तथा सूचना प्रविधि समितिको बिहान १० बजे बस्ने बैठकमा ‘राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१’ का सम्बन्धमा छलफल हुनेछ।
सार्वजनिक लेखा समितिको बैठकमा नेपाललाई प्राप्त हुने वैदेशिक सहायताको लेखापरीक्षणसम्बन्धी विषय उठाइनेछ। उक्त बैठक पनि बिहान १० बजे बस्नेछ।
यता, विधायन व्यवस्थापन समितिको बैठक अपराह्न १ बजे बस्नेछ। बैठकमा विधायिकी अन्तरसम्बन्धका विषयमा गाउँपालिका राष्ट्रिय महासङ्घ नेपालका अध्यक्ष तथा कार्यकारी निर्देशकसँग छलफल गरिने कार्यक्रम छ।
यसरी आज एकै दिन बस्ने नौ वटा संसदीय समितिका बैठकले कानुन निर्माणदेखि आर्थिक नीति, सुशासन, कृषि, पर्यटन, पूर्वाधार विकास र सार्वजनिक स्रोतको पारदर्शितासम्मका विषयलाई केन्द्रमा राखेका छन्। समितिका छलफलबाट प्राप्त सुझाव तथा निष्कर्षले आगामी दिनमा विधेयक निर्माण, सरकारी निकायको निगरानी र नीतिगत निर्णयमा समेत प्रभाव पार्ने अपेक्षा गरिएको छ।
