नियमित गस्तीमा रहेको प्रहरी टोलीले देशका विभिन्न स्थानबाट अवैध गतिविधिमा संलग्न पाँच जनालाई नियन्त्रणमा लिएको छ। पक्राउ पर्नेहरूमा लागूऔषध कारोबारीदेखि दुर्लभ वन्यजन्तुका अङ्ग तस्करीमा संलग्न व्यक्तिहरू रहेका छन्।
काठमाडौँको मुख्य नाका नागढुङ्गाबाट खैरो हेरोइनसहित बर्दियाका २४ वर्षीय निकलेश गोडिया पक्राउ परेका छन्। उनलाई शुक्रबार चन्द्रागिरी नगरपालिका–२ बाट प्रहरीले नियन्त्रणमा लिएको हो।
यस्तै, तनहुँको देवघाटमा प्रहरीले ठुलो सफलता हात पारेको छ। ३६ वर्षीय कृष्ण तामाङ (रोहित) को घरमा खानतलासी गर्दा गाँजा र प्रतिबन्धित औषधिसँगै दुर्लभ वन्यजन्तु गैँडाको छाला र जरायोका सिङसमेत बरामद भएको छ।
यसैगरी, झापाको हल्दीबारी गाउँपालिका–३ बाङ्गे बजारबाट पनि खैरो हेरोइनसहित तीन जनालाई पक्राउ गरिएको केन्द्रीय प्रहरी समाचार कक्षले जनाएको छ। देशभर सुरक्षा गस्ती बढाएसँगै प्रहरीले अवैध तस्करी र आपराधिक सञ्जालमाथि निगरानी कडा पारेको छ।
