काठमाडौँ । शान्तिका दूत गौतम बुद्धको जन्मजयन्ती मनाइँदै गर्दा आज काठमाडौँको बल्खुस्थित साङ्गे छोइलिङ्ग गुम्बामा भने महानगरपालिकाको डोजर चलेको छ। २०७८ साल कात्तिक १३ गते दर्ता भई सञ्चालनमा रहेको यो धार्मिक स्थललाई महानगरले शुक्रबार वैशाख शुक्ल पूर्णिमाकै दिन पूर्ण रूपमा भत्काएको हो।
महानगरपालिकाले सार्वजनिक जग्गा अतिक्रमण गरी बनाइएका संरचना हटाउने अभियान अन्तर्गत यो कदम चालेको बताएको छ। गुम्बा भत्काउनुअघि त्यहाँ रहेका बुद्धका मूर्ति र अन्य बहुमूल्य धार्मिक सामग्रीहरू बाहिर निकालिएको थियो।
आजको घटनाक्रम र अन्य प्रभावित क्षेत्र
महानगरको डोजर आतङ्क आज बल्खुमा मात्र सीमित रहेन। बिहानैदेखि निम्नलिखित स्थानहरूमा संरचना हटाउने कार्य जारी छ:
बल्खु र टेकु नजिकैको वंशीघाट: यहाँ सुकुम्बासी बस्ती र सार्वजनिक जग्गामा बनेका टहराहरू हटाइँदै छ।
बालाजु क्षेत्र: बालाजुमा पनि सार्वजनिक जग्गा मिचेर बनाइएका घर-टहराहरू भत्काउने कार्य तीव्र पारिएको छ।
धार्मिक आस्थामा चोट पुगेको भन्दै विरोध
बालाजुस्थित ओग्यन जम्लिङ टेरमा गुम्बामा पनि डोजर चलाउने तयारी गरिएपछि वातावरण तनावपूर्ण बनेको छ। बुद्ध जयन्तीजस्तो पवित्र दिनमा विशेषगरी बौद्ध धर्मावलम्बीहरूका आस्थाका केन्द्रहरूमा डोजर लगाउनुलाई धेरैले संवेदनशील मानिरहेका छैनन्।
"सरकारले नियम पालना गराउनु ठिक हो, तर बुद्ध जयन्तीकै दिन गुम्बा भत्काएर हाम्रो आस्थामाथि निर्मम प्रहार गरियो," स्थानीय एक धर्मावलम्बीले आक्रोस पोखे।
महानगरपालिकाले भने कानुन विपरीत बनेका कुनै पनि संरचना बाँकी नराख्ने आफ्नो अडान दोहोर्याएको छ। तर, विशेष पर्वको दिन छानिएकाले सामाजिक सञ्जाल र धार्मिक समुदायमा भने यसको तीव्र आलोचना भइरहेको छ।
