रविन्द्र कट्टेल - पोखरा उपत्यकाको पुम्दिकोट अहिले धार्मिक आस्था, प्राकृतिक सौन्दर्य र पर्यटनको अनुपम संगम बनेको छ। ५१ फिट अग्लो भगवान् शिव (महादेव) को विशाल मूर्ति निर्माणसँगै यो क्षेत्र देश-विदेशका पर्यटकका लागि नयाँ र शक्तिशाली गन्तव्यका रूपमा उदाएको छ।
धार्मिक पर्यटनलाई प्रवर्द्धन गर्ने उद्देश्यले करिब २२ रोपनी क्षेत्रफलमा निर्माण गरिएको यस संरचनामा विशाल शिव मूर्तिसँगै १०८ वटा शिवलिङ्ग, डमरु, कलशलगायत आकर्षक धार्मिक संरचनाहरू रहेका छन्। यसले पुम्दिकोटलाई केवल दर्शनस्थल मात्र होइन, एक समग्र आध्यात्मिक अनुभव दिने केन्द्रको रूपमा स्थापित गरेको छ।
पोखरा बजारबाट करिब १३ किलोमिटर दूरीमा रहेको पुम्दिकोटबाट सराङकोट, फेवाताल, सम्पूर्ण पोखरा उपत्यका र मौसम खुलेका दिनमा हिमशृंखलासम्मको मनमोहक दृश्य अवलोकन गर्न सकिन्छ। यही कारणले यहाँ धार्मिक पर्यटकसँगै प्रकृतिप्रेमी, फोटो पत्रकार र आन्तरिक घुमन्तेहरूको उल्लेख्य भीड लाग्न थालेको छ।
स्थानीयका अनुसार पुम्दिकोटमा दैनिक सयौँ पर्यटक पुग्न थालेका छन्। यसले स्थानीय रोजगारी, व्यवसाय र समग्र पोखरा क्षेत्रको पर्यटन अर्थतन्त्रमा नयाँ ऊर्जा थपेको छ।
आस्था, शान्ति र सौन्दर्य खोज्ने पर्यटकका लागि पुम्दिकोट अब पोखराको ‘नयाँ पहिचान’ बन्दै गएको छ-जहाँ महादेवको दर्शनसँगै प्रकृतिको विराट रूप एकैचोटि अनुभूति गर्न सकिन्छ।
