फ्रान्सले रूससँग जारी युद्धको क्रममा युक्रेनलाई १०० वटा Rafale लडाकू विमान उपलब्ध गराउने सहमति जनाएको छ। यो निर्णय युक्रेनी राष्ट्रपति भोलोदिमिर जेलेन्स्की र फ्रान्सका राष्ट्रपति इमानुअल म्याक्रोनबीचको भेटपछि सार्वजनिक भएको हो।
अमेरिकी राष्ट्रपति डोनाल्ड ट्रम्पले युक्रेनलाई प्रत्यक्ष सैन्य सहायता घटाएपछि, युरोपेली मुलुकहरूले यसलाई समर्थन गर्दै युक्रेनलाई दिने सैन्य सहयोग बढाएका छन्। फ्रान्सले दिने विमान र अन्य सैन्य उपकरणहरू सन् २०३५ सम्म चरणबद्ध रूपमा हस्तान्तरण हुने जनाइएको छ। यसले तत्काल युद्धको दिशा बदल्न नसक्ने भए पनि दीर्घकालीन रूपमा युक्रेनको हवाई शक्ति मजबुत हुने विश्लेषकहरूले उल्लेख गरेका छन्।
यसअघि स्विडेनले युक्रेनलाई १५० सम्मका लडाकू विमान उपलब्ध गराउने सहमति जनाएको थियो। फ्रान्सको निर्णयपछि युरोपेली देशहरूले युक्रेनको रक्षा क्षमता बलियो बनाउन दृढता देखाएका छन्।
जेलेन्स्कीले सामाजिक सञ्जालमा यस सम्झौतालाई “ऐतिहासिक कदम” भनेका छन् भने म्याक्रोनले यो कदमले फ्रान्स–युक्रेन रक्षा उद्योगबीच सम्बन्ध सुदृढ पार्ने दाबी गरेका छन्।
विश्लेषकहरूका अनुसार युरोपेली मुलुकहरूले अमेरिकाबाट हतियार खरिद गर्ने वा आफ्नै उत्पादन बेच्ने माध्यमबाट युक्रेनलाई सहयोग गर्दै, आफ्नो रक्षा उद्योगलाई समेत सुदृढ पार्ने रणनीति अपनाइरहेका छन्।
