कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट ग्राउन्डमा नेपाल प्रिमियर लिग (एनपिएल) दोस्रो संस्करणको लिग चरण आज आफ्नो अन्तिम मोडमा पुगेको छ।
अपराह्न ३:३० बजे निर्धारित अन्तिम खेलमा कर्णाली याक्स र गत संस्करणका च्याम्पियन जनकपुर बोल्ट्स आमनेसामने हुँदैछन्।
छ खेलबाट दुवै टोलीले जम्मा दुई–दुई अंक मात्र बटुलेपछि प्लेअफ यात्रा यतै टुंगिएको छ। त्यसैले आजको भिडन्तले अंकतालिकामा खासै प्रभाव नपारे पनि खेलाडीहरूले टीमको प्रतिष्ठा र व्यक्तिगत प्रदर्शन सुधार्ने अवसरको रूपमा लिन अपेक्षा गरिएको छ।
यसअघि नै सुदूरपश्चिम रोयल्स लिगको शीर्ष स्थानमा उक्लँदै क्वालिफायरमा पुगेको छ भने विराटनगर किंग्सले दोस्रो स्थान सुरक्षित गरेको छ। काठमाडौँ गोर्खाज र लुम्बिनी लायन्स चाहिँ इलिमिनेटरको यात्रामा छन्।
एनपिएल प्लेअफ अन्तर्गत मंगलबार सुदूरपश्चिम रोयल्स र विराटनगर किंग्सबीच पहिलो क्वालिफायर हुनेछ। त्यसपछि बुधबार काठमाडौँ गोर्खाज र लुम्बिनी लायन्सबीच रोमाञ्चक इलिमिनेटर खेल हुनेछ, जहाँ पराजित टोली प्रतियोगिताबाट बाहिरिनेछ।
