वासिङ्टन डीसी - अमेरिकी सेनाले अरब सागरमा आफ्नो विमानवाहक जहाज यूएसएस अब्राहम लिंकन नजिक आक्रमक रूपमा नजिकिँदै गरेको इरानी ड्रोनलाई एफ-३५सी स्टेल्थ लडाकु विमानमार्फत खसाल्यो। घटना इरानको तटबाट करिब ५०० माइल टाढा भएको थियो। सेनाले यस घटनामा कुनै अमेरिकी सैनिक घाइते नभएको र जहाजमा क्षति नभएको जानकारी दिएको छ।
प्रवक्ता क्याप्टेन टिम हकिन्सका अनुसार ड्रोनको उद्देश्य स्पष्ट नभए पनि यो अमेरिकी जहाजको सुरक्षा र आत्मरक्षाका लागि खसालिएको हो।
यो घटना अमेरिका–इरान बीच बढ्दो तनावको बीचमा आएको हो। अमेरिकाले यस क्षेत्रमा आफ्नो सैन्य उपस्थिति सुदृढ पार्दै आएको छ भने इरानले आणविक कार्यक्रम सीमित गर्ने सम्झौतामा नआए सैन्य कारबाहीको चेतावनी दिइसकेको छ।
ड्रोन खसालिएपछि ह्वाइट हाउसकी प्रेस सचिव क्यारोलिन लेभिटले फक्स न्युजसँग भनेकी छन् कि अमेरिकाको र इरानबीच यस साता तय भएका वार्ता यथावत् रहनेछन्।
इरानका सर्वोच्च नेता आयातोल्लाह अली खामेनीले पहिले नै चेतावनी दिएका थिए कि अमेरिकी आक्रमण भए क्षेत्रीय युद्ध भड्किन सक्छ। तर मंगलबारको घटनाबारे इरानले औपचारिक प्रतिक्रिया दिएको छैन।
